Óshyrnan er ægifagurt fjall sem stendur í mynni Bolungarvíkur við Ísafjarðardjúp.
Fremst í fjallinu stendur kletturinn Þuríður sem er kenndur við landnámskonuna Þuríði Sundafylli sem nam land í Bolungarvík árið 940. Þuríður var kyngimögnuð kona og mikill leiðtogi sem lagði grunn að gjöfulum fiskmiðum úti fyrir Bolungarvík sem voru lífsbjörg íbúanna um aldir. Óshyrnan rís 656 metra yfir sjávarmáli og eru hlíðar fjallsins snarbrattar og prýddar formfögrum klettadröngum. Fjallið er vinsælt til útivistar og hægt er að ganga á fjallið jafnt á vetri sem sumri. Auðvelt er að ganga upp í Óshvilft til hliðar við fjallið, en hægt er að ganga á toppinn upp nokkuð bratta hlíð. Af toppi fjallsins er frábært útsýni yfir Bolungarvík og um allt Ísafjarðadjúp.

Teikning: Berglind Halla Elíasdóttir