Ómótstæðileg ostapizza

Ómótstæðileg ostapizza sem þú átt eftir að elska!

Hér höfum við uppskrift af pizzu sem ég smelli í nánast hverja einustu helgi! Afhverju er hún að koma fyrst inn á síðuna núna, spyrjið þið mögulega? Það er góð spurning sem ég eiginlega hef ekki svarið við 😆 Það er nánast orðið eins og að drekka vatn fyrir mér að smella í þessa pizzu og er hún löngu orðin fræg hjá fjölskyldu og vinum sem fá reglulega boð í pizzaveislur til okkar um helgar.

Það var ekki fyrr en vinkona mín sendi mér skilaboð um daginn og bað um uppskriftina, að ég fattaði að hún væri ekki á síðunni. Fram að því hvarflaði ekki að mér að þessi uppskrift, sem er orðin eins og hluti af mér, væri ekki á síðunni.

Svo hér er hún komin loksins, ómótstæðilega ostapizzan , gjöriði svo vel!

Uppskrift og myndir frá Lindu Ben.

Innihaldsefni

Pizzadeig (þessi uppskrift er mjög góð, ég elska líka að kaupa súrdeigs pizzadeig sem fæst í mörgum bakaríum)

Hvítlauksolía

Rifinn mozzarella frá Örnu Mjólkurvörum

Hvítlauks kryddostur frá Örnu Mjólkurvörum

Brie

Bláberja eða rifsberjasulta (bæði mjög gott, veldu það sem þú ert í stuði fyrir eða átt til heima)

Aðferð

Kveikið á pizzaofninum, ef notaður er venjulegur bakaraofn þá stilliru á 220°C og undir+yfir hita. Ég nota þennan pizzaofn og ELSKA hann, tekur algjörlega pizzuna á annað stig.
Fletjið út pizzadeigið og smyrjið hvítlauksolíunni á botninn.
Setjið rifinn mozzarella yfir (aðeins minna magn en ef þú værir að fara setja “venjulegt” (ekki osta) álegg á. Rífið helmigninn af hvítlauks kryddostinum niður og dreifið yfir.
Skerið brie í sneiðar og dreifið yfir.
Bakið inn í ofni þar til kantanir eru byrjaðir að brúnast og osturinn orðinn gullinn.
Berið fram með sultu.