Örlítið hollari súkkulaðibitakökur

Ást mín á súkkulaðibita kökum er í algjöru hámarki þessa dagana, heilsu minnar vegna varð ég að finna örlítið hollari útgáfu af þessu gúmmulaði, án þess að það hefði áhrif á bragðið.

Þessi uppskrift er einmitt þannig, akkurat eins og góðar súkkulaðibita kökur eiga að vera, nema úr örlítið hollari innihaldsefnum, fullkomið ef þú spyrð mig!

Uppskrift og myndir frá Lindu Ben.

Innihaldsefni

1 ½ dl kókosolía

2 ¼ dl púðursykur

1 dl döðlusykur

2 egg

1 tsk vanilludropar

5 dl hveiti

1 tsk lyftiduft

1 tsk salt

1 dl grísk jógúrt frá Örnu Mjólkurvörum

100 g hvítt súkkulaði

100 g dökkt súkkulaði

Aðferð

Hrærið saman sykur og kókosolíu, bætið svo einu eggi út í í einu og hrærið vel á milli. Því næst bætiði vanilludropum út í.
Bætið hveiti, lyftidufti, salti saman við ásamt grískri jógúrt, blandið varlega saman við.
Skerið súkkulaðið niður í grófa bita og bætið úr í, blandið saman með sleikju.
Setjið deigið inn í ísskáp og kælið það í 2-3 tíma eða yfir nótt, eftir því hvað hentar þér best.
Kveikjið á ofninum og stillið á 190°C. Notið matskeið til að skammta hverja köku, mótið kúlu með lófunum og raðið á smjörpappír, passið að hafa gott bil á milli þar sem kökurnar fletjast út í ofninum. Bakið í 10-12 mín.